अठरा वेद पुराणे, सोळा विद्या आणि चौसष्ट कलांनी संपन्न असणार्‍या आपल्या भारतभूमीला अतिशय समृद्ध अशी सांस्कृतिक इतिहासाची पार्श्वभूमी लाभली आहे. हा वारसा युवा पिढीने अंगिकारावा, पुढे न्यावा, आपल्या अंगभूत कलागुणांना, क्रीडा आणि सांस्कृतिक अभिरुचीला फुलवावे यासाठी बापू नेहेमीच प्रयत्नशील राहिले आहेत.

विविध कलागुणांच्या आविष्काराने समाजमनाची सांस्कृतिक उन्नती होत असते. विविध खेळांच्या माध्यमातून वैरभाव दूर ठेवून लढण्याची, स्वतःला आजमावून पाहण्याची संधी मिळते. अभिजात कलांच्या माध्यमातून व्यक्तिमत्व विकास होतो व त्यातूनच राष्ट्राचा विकास होण्यास योगदान मिळते. याच विचारातून तरुण तरुणींनी कला, क्रीडा व सांस्कृतिक क्षेत्रात पुढे यावे यासाठी लोकमंगल कला, क्रीडा, सांस्कृतिक व युवक मंडळाच्या माध्यमातून बापूंनी अनेक सांस्कृतिक व क्रीडा विषयक उपक्रम सुरू केले आहेत.

आपल्या समाजातील तरुण तरुणींची अष्टपैलू व्यक्तिमत्वे घडावीत या ध्येयाने प्रेरित होऊन या मंडळाची मुहुर्तमेढ रोवली गेली. शैक्षणिक क्षेत्राविषयी तळमळ असणार्‍या बापूंनी विद्याभ्यासाचे मोल जाणून अनेक शैक्षणिक उपक्रम तर राबविले आहेतच परंतु त्याचबरोबर युवा पिढीच्या कलागुणांना चालना मिळून त्यांची विविधांगी प्रगती व्हावी यासाठी या मंडळातर्फे नियमितपणे विविध कार्यक्रमांचे आयोजनही केले जाते.